Home » Kannada News » ಕರ್ನಾಟಕದ ಮುಂದಿನ ಮುಖ್ಯಮಂತ್ರಿ ಯಾರು? ಇಲ್ಲಿದೆ ಸಂಭಾವ್ಯರ ಪಟ್ಟಿ

ಕರ್ನಾಟಕದ ಮುಂದಿನ ಮುಖ್ಯಮಂತ್ರಿ ಯಾರು? ಇಲ್ಲಿದೆ ಸಂಭಾವ್ಯರ ಪಟ್ಟಿ

ರಾಜ್ಯದಲ್ಲಿ ನಾಯಕತ್ವ ಬದಲಾವಣೆ ಸುತ್ತ ಗೊಂದಲ ಮುಂದುವರಿದಿದೆ. ಆದರೆ ಹಾಲಿ ಮುಖ್ಯಮಂತ್ರಿ ಬಿಎಸ್‌ ಯಡಿಯೂರಪ್ಪ ಮಾಡುತ್ತಿರುವ ಟ್ಟೀಟ್‌, ನೀಡುತ್ತಿರುವ ಹೇಳಿಕೆಗಳನ್ನು ಗಮನಿಸಿದರೆ ರಾಜೀನಾಮೆ ನಿರ್ಧಾರಕ್ಕೆ ಬಂದಂತೆ ಭಾಸವಾಗುತ್ತಿದೆ.

‘ರಾಷ್ಟ್ರೀಯ ನಾಯಕರು ನನ್ನ ಮೇಲೆ ಪ್ರೀತಿ, ವಿಶ್ವಾಸ ಇಟ್ಟುಕೊಂಡಿದ್ದಾರೆ. ಅವರು ಏನು ಸೂಚನೆ ನೀಡುತ್ತಾರೆ ಅದರಂತೆ ನಡೆದುಕೊಳ್ಳುತ್ತೇನೆ’ ಎಂದು ಯಡಿಯೂರಪ್ಪ ಹೇಳಿದ್ದಾರೆ. ಈ ಮೂಲಕ ರಾಜ್ಯ ನೂತನ ಮುಖ್ಯಮಂತ್ರಿಯನ್ನು ಕಾಣುವ ದಿನಗಳು ಸಮೀಪಿಸುತ್ತಿರುವಂತೆ ಕಾಣುತ್ತಿದೆ. ಹಾಗೊಮ್ಮೆ ಸಿಎಂ ಬದಲಾವಣೆಗೆ ಬಿಜೆಪಿ ಹೈಕಮಾಂಡ್‌ ಕೈ ಹಾಕಿದರೆ ಆ ಸ್ಥಾನ ಅಲಂಕರಿಸುವವರು ಯಾರು? ರೇಸ್‌ನಲ್ಲಿ ಯಾರೆಲ್ಲ ಇದ್ದಾರೆ? ಈ ಕುರಿತ ಸಂಕ್ಷಿಪ್ತ ವಿವರ ಇಲ್ಲಿದೆ.

​ಪ್ರಲ್ಹಾದ್‌ ಜೋಶಿ

ಕೇಂದ್ರ ಸಚಿವ ಪ್ರಲ್ಹಾದ್ ಜೋಶಿ ಸಿಎಂ ರೇಸ್‌ನಲ್ಲಿ ಮುಂಚೂಣಿಯಲ್ಲಿದ್ದಾರೆ. ಪ್ರಧಾನಿ ನರೇಂದ್ರ ಮೋದಿ ಆದಿಯಾಗಿ ಬಿಜೆಪಿಯ ಉನ್ನತ ನಾಯಕರ ಜತೆ ನಿಕಟ ಸಂಬಂಧ ಹೊಂದಿರುವ ಸಂಸದೀಯ ವ್ಯವಹಾರ ಸಚಿವ ಜೋಶಿ ಸಿಎಂ ಸ್ಥಾನದ ಮೇಲೆ ಯಾವತ್ತೋ ಕಣ್ಣಿಟ್ಟವರು. ಅದಕ್ಕೀಗ ಕಾಲ ಕೂಡಿ ಬಂದಂತೆ ಕಾಣುತ್ತಿದೆ.

ಒಂದು ಕಾಲದಲ್ಲಿ ರಾಜ್ಯ ಬಿಜೆಪಿ ಅಧ್ಯಕ್ಷರಾಗಿ ಪಕ್ಷ ಮುನ್ನಡೆಸಿದ್ದ ಅನುಭವವೂ ಜೋಶಿ ಅವರಿಗಿದೆ. ಇನ್ನೊಂದೆಡೆ ಗುಜರಾತ್‌ ಸೇರಿ ಹಲವು ರಾಜ್ಯಗಳಲ್ಲಿ ಬಹುಸಂಖ್ಯಾತ ಸಮುದಾಯವನ್ನು ಬಿಟ್ಟು ಸಣ್ಣ ಸಮುದಾಯಗಳಿಗೆ ಬಿಜೆಪಿ ಮಣೆ ಹಾಕಿದೆ. ಈ ಮೂಲಕ ಸಮುದಾಯದ ಪ್ರಭಾವಕ್ಕೆ ಮಣಿಯಲ್ಲ ಎಂಬ ಸಂದೇಶವನ್ನೂ ರವಾನಿಸಿದೆ.

ಇದೇ ರೀತಿ ಕರ್ನಾಟಕದಲ್ಲೂ ನಡೆದಲ್ಲಿ ಪ್ರಲ್ಹಾದ್‌ ಜೋಶಿ ಅವರಿಗೆ ಮಣೆ ಹಾಕುವ ಸಾಧ್ಯತೆ ಇಲ್ಲದ್ದಿಲ್ಲ. ಸದ್ಯಕ್ಕೆ ಸಿಎಂ ರೇಸ್‌ನ ಹಾಟ್‌ ಫೇವರಿಟ್‌ ಎನಿಸಿಕೊಂಡಿದ್ದಾರೆ ಈ ಕೇಂದ್ರ ಸಚಿವರು.

ಜುಲೈ 25 ರ ರಹಸ್ಯ : ಬಿಎಸ್‌ವೈಗೆ ಹೈಕಮಾಂಡ್ ಕೊಡಲಿರುವ ಆ ಸೂಚನೆ ಏನು?

​ಬಸವರಾಜ ಬೊಮ್ಮಾಯಿ

ಯಡಿಯೂರಪ್ಪ ಪರಮಾಪ್ತರಾಗಿ ಗುರುತಿಸಿಕೊಂಡಿರುವ ಹಾಲಿ ಗೃಹ ಸಚಿವ ಬಸವರಾಜ್‌ ಬೊಮ್ಮಾಯಿ ಸಿಎಂ ರೇಸ್‌ನಲ್ಲಿರುವ ಮತ್ತೋರ್ವ ಸಂಭಾವ್ಯ ಅಭ್ಯರ್ಥಿ. ಬಿಎಸ್‌ವೈ ಬೆಂಬಲದಿಂದ ಬಿಜೆಪಿಯ ಹಿರಿತಲೆಗಳನ್ನೆಲ್ಲ ಹಿಂದಿಕ್ಕಿ ಗೃಹ ಸಚಿವ ಸ್ಥಾನ ಬಾಚಿಕೊಂಡಿರುವ ಬೊಮ್ಮಾಯಿ ಇದೀಗ ಸಿಎಂ ಆದರೂ ಅಚ್ಚರಿಯಿಲ್ಲ ಎಂಬ ಮಾತುಗಳು ಓಡಾಡುತ್ತಿವೆ.

ಜತೆಗೆ ಲಿಂಗಾಯತ ಎನ್ನುವುದು ಮಾಜಿ ಸಿಎಂ ಎಸ್‌.ಆರ್‌. ಬೊಮ್ಮಾಯಿ ಪುತ್ರ ಬಸವರಾಜ್‌ ಅವರ ಇನ್ನೊಂದು ಪ್ಲಸ್‌ ಪಾಯಿಂಟ್‌. ರಾಜ್ಯದಲ್ಲಿ ಎರಡೂ ಬಾರಿ ಬಿಜೆಪಿ ಅಧಿಕಾರಕ್ಕೆ ಬರಲು ಲಿಂಗಾಯತರೇ ಕಾರಣ ಎಂಬುದು ಹೈಕಮಾಂಡ್‌ಗೆ ಸ್ಪಷ್ಟವಾಗಿ ಗೊತ್ತಿದೆ. ಜತೆಗೆ ಯಡಿಯೂರಪ್ಪ ಅವರನ್ನು ಹುದ್ದೆಯಿಂದ ಕೆಳಗಿಳಿಸುವ ಸಂಬಂಧ ಈಗಾಗಲೇ ಸಮುದಾಯದಿಂದ ಪ್ರಬಲ ವಿರೋಧವೂ ವ್ಯಕ್ತವಾಗುತ್ತಿದೆ. ಹಾಗೊಮ್ಮೆ ಬೀಸೋ ದೊಣ್ಣೆಯಿಂದ ತಪ್ಪಿಸಿಕೊಳ್ಳಲು ಬೊಮ್ಮಾಯಿಯನ್ನು ನೂತನ ಸಿಎಂ ಎಂದು ಬಿಜೆಪಿ ವರಿಷ್ಠರು ಆಯ್ಕೆ ಮಾಡಿದರೂ ಅಚ್ಚರಿ ಇಲ್ಲ.

ಬಿಎಸ್‌ವೈ ಪದತ್ಯಾಗದ ಸುಳಿವು: ಕುತೂಹಲ ಕೆರಳಿಸಿದ ಸಚಿವ ಸಂಪುಟ ಸಭೆ!

​ಮುರುಗೇಶ್‌ ನಿರಾಣಿ

ಬಿಎಸ್‌ವೈ ಸಂಪುಟ ಸೇರಲು ಭಾರಿ ಶ್ರಮಪಟ್ಟಿದ್ದ ಗಣಿ ಮತ್ತು ಭೂ ವಿಜ್ಞಾನ ಸಚಿವ ಮುರುಗೇಶ್‌ ನಿರಾಣಿ ಹೆಸರು ಇದೀಗ ಸಿಎಂ ಹುದ್ದೆಗೆ ಕೇಳಿ ಬರುತ್ತಿದೆ. ಪಂಚಮಸಾಲಿ ಸಮುದಾಯದ ನಿರಾಣಿ ಬೆನ್ನಿಗೆ ಒಂದಿಷ್ಟು ಮಠಾಧಿಪತಿಗಳೂ ಇದ್ದಾರೆ. ಜತೆಗೆ ದಿಲ್ಲಿಯಲ್ಲಿ ಲಾಬಿ ಮಾಡಲು ಬೇಕಾದ ಸಂಪರ್ಕವೂ ಇದೆ.

90ರ ದಶಕದಿಂದಲೇ ಆರ್‌ಎಸ್‌ಎಸ್‌ ಜತೆಗಿರುವುದೂ ಅವರ ಪಾಲಿನ ಧನಾತ್ಮಕ ಅಂಶಗಳಲ್ಲಿ ಒಂದು. ಈ ಹಿಂದೆಯೂ ಸಚಿವರಾಗಿ ಕೆಲಸ ಮಾಡಿದ ಅನುಭವವೂ ನಿರಾಣಿ ಅವರದ್ದು. ಮೊದಲ ಬಾರಿ ಯಡಿಯೂರಪ್ಪ ಸಿಎಂ ಆಗಿದ್ದಾಗ ಕೈಗಾರಿಕಾ ಸಚಿವರಾಗಿ ಕರ್ನಾಟಕಕ್ಕೆ ಬಂಡವಾಳ ಹರಿದು ಬರುವಂತೆ ಮಾಡಿದ್ದರು. ಸಕ್ಕರೆ, ಇಂಧನ ಸೇರಿ ಹಲವು ಉದ್ಯಮಗಳಲ್ಲೂ ತೊಡಗಿಸಿಕೊಂಡಿರುವ ಪ್ರಭಾವಿ ರಾಜಕಾರಣಿ ನಿರಾಣಿ ಸಿಎಂ ಆದರೆ ಅಂಥಹ ವಿಶೇಷವೇನಿಲ್ಲ.

​ಡಾ.ಸಿ.ಎನ್‌. ಅಶ್ವತ್ಥ ನಾರಾಯಣ

ಜಂಟಲ್‌ಮೆನ್‌ ರಾಜಕಾರಣಿಯಾಗಿ ಗುರುತಿಸಿಕೊಂಡಿರುವವರು ಬೆಂಗಳೂರಿನ ಮಲ್ಲೇಶ್ವರಂ ಶಾಸಕ ಡಾ.ಸಿ.ಎನ್‌. ಅಶ್ವತ್ಥ ನಾರಾಯಣ. ವೃತ್ತಿಯಿಂದ ವೈದ್ಯರಾಗಿರುವ ಇವರು ಸಿಎಂ ರೇಸ್‌ನಲ್ಲಿರುವ ಇನ್ನೋರ್ವ ಪ್ರಮುಖರು.

ರಾಜ್ಯದಲ್ಲಿ ಈ ಬಾರಿ ಬಿಜೆಪಿಯನ್ನು ಅಧಿಕಾರಕ್ಕೆ ತರುವಲ್ಲಿ ಮಹತ್ವದ ಪಾತ್ರ ವಹಿಸಿರುವ ಅಶ್ವತ್ಥ ನಾರಾಯಣ ಅವರಿಗೆ ಬಿಜೆಪಿ ಒಮ್ಮೆಗೆ ಡಿಸಿಎಂ ಸ್ಥಾನ ನೀಡಿದೆ. ಜತೆಗೆ ಉನ್ನತ ಶಿಕ್ಷಣ, ಐಟಿ & ಬಿಟಿ, ವಿಜ್ಞಾನ ಮತ್ತು ತಂತ್ರಜ್ಞಾನ, ಕೌಶಲ್ಯ ಅಭಿವೃದ್ಧಿ, ಉದ್ಯಮಶೀಲತೆ ಮತ್ತು ಜೀವನೋಪಾಯ ಸಚಿವರಾಗಿರುವ ಇವರು ಸಿಎಂ ಆಗಬಹುದು ಎಂಬ ಮಾತುಗಳೂ ಕೇಳಿಬರುತ್ತಿವೆ.

ಐಟಿ & ಬಿಟಿ ಕ್ಷೇತ್ರದಲ್ಲಿ ಮುಂಚೂಣಿಯಲ್ಲಿರುವ ಕರ್ನಾಟಕಕ್ಕೆ ಅದೇ ಸಚಿವರಾಗಿ ಅನುಭವ ಇರುವವರು, ಹೊಸ ಜನರೇಷನ್‌ ರಾಜಕಾರಣಿಗಳು ಸಿಕ್ಕಿದರೆ ಲಾಭ ಜಾಸ್ತಿ. ಜತೆಗೆ ಒಕ್ಕಲಿಗರು ಬೇರೆ; ಎರಡನೇ ಪೀಳಿಗೆಗೆ ನಾಯಕತ್ವ ನೀಡುವ ಲೆಕ್ಕಾಚಾರವನ್ನೂ ಹೈಕಮಾಂಡ್‌ ಹಾಕಿದರೆ ಮೊದಲು ಕಾಣಿಸುವ ಹೆಸರೇ ಅಶ್ವತ್ಥ ನಾರಾಯಣ್.

​ಅರವಿಂದ ಬೆಲ್ಲದ್‌, ಸಿಟಿ ರವಿ…

ಇತ್ತೀಚೆಗೆ ಏಕಾಏಕಿ ಸಿಎಂ ರೇಸ್‌ನಲ್ಲಿ ಕೇಳಿ ಬಂದಿರುವ ಹೆಸರು ಬಿಜೆಪಿ ಶಾಸಕ ಅರವಿಂದ ಬೆಲ್ಲದ್‌ ಅವರದ್ದು. ಅವರೀಗ ದಿಢೀರ್‌ ವಾರಣಾಸಿಗೆ ತೆರಳಿ ಕಾಶಿ ಜಗದ್ಗುರುಗಳನ್ನು ಭೇಟಿಯಾಗಿ ಆಶೀರ್ವಾದ ಪಡೆದಿದ್ದಾರೆ. ಕಳೆದ ಹಲವು ವಾರಗಳಿಂದ ದಿಲ್ಲಿಗೆ ಆಗಾಗ ಭೇಟಿ ನೀಡುತ್ತಲೇ ಇದ್ದಾರೆ.

ಇನ್ನೊಂದೆಡೆ ಒಕ್ಕಲಿಗ, ಬಿಜೆಪಿ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಸಿ.ಟಿ. ರವಿ, ಕಂದಾಯ ಸಚಿವ ಆರ್‌. ಅಶೋಕ್‌ ಮೊದಲಾದವರ ಹೆಸರೂ ಸಿಎಂ ಸ್ಥಾನಕ್ಕೆ ಪ್ರಸ್ತಾಪವಾಗಿವೆ. ಹಿಂದೊಮ್ಮೆ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ (ಸಂಘಟನೆ) ಬಿಎಲ್‌ ಸಂತೋಷ್‌ ಹೆಸರೂ ಪ್ರಬಲವಾಗಿ ಕೇಳಿ ಬಂದಿತ್ತು. ಆದರೆ ಈ ಬಾರಿ ಏಕೋ ಹೆಸರು ಪ್ರಸ್ತಾಪವಾಗುತ್ತಿಲ್ಲ.

ಇವರೆಲ್ಲರ ನಡುವೆ ಅಚ್ಚರಿಯ ಹೆಸರನ್ನು ಬಿಜೆಪಿ ವರಿಷ್ಠರು ಮುಂದೆ ಬಿಟ್ಟರೂ ಅಚ್ಚರಿಯಿಲ್ಲ. ಹಲವು ರಾಜ್ಯಗಳಲ್ಲಿ ಈ ರೀತಿ ರೇಸ್‌ನಲ್ಲೇ ಇಲ್ಲದವರನ್ನು ಸಿಎಂ ಸ್ಥಾನಕ್ಕೆ ತಂದು ಕೂರಿಸಿದ ಉದಾಹರಣೆಯೂ ಇತ್ತೀಚಿನ ದಿನಗಳಲ್ಲಿ ಹೆಚ್ಚಾಗಿ ಇದೆ.


Source link

x

Check Also

Nithya Bhavishya: ಈ ಎರಡು ರಾಶಿಯವರಿಗಿಂದು ಅದೃಷ್ಟದ ದಿನ..! ನಿಮ್ಮ ದಿನ ಹೇಗಿದೆ..?

2021 ಜುಲೈ 24 ರ ಶನಿವಾರವಾದ ಇಂದು, ಶನಿಯೊಂದಿಗೆ ಶನಿಯ ಗ್ರಹವಾದ ಮಕರ ರಾಶಿಯಲ್ಲಿ ಚಂದ್ರನು ಇರುತ್ತಾನೆ. ಶನಿ ಮತ್ತು ...